بخاف

أيوة بخاف!!

يمكن كلامي مايدلّش..

و شكلي ما فيهوش اختلاف

لكني بخاف!!

أخاف لو شمسي طلعت..

من لحظة غروب قريبة

أخاف لو بعد الضلمة

يا شمس ما تطلعيش

أخاف أقوم في يوم و مالقاكيش

أخاف أعيش

على أمل يطلع وهم

و ما ينتهيش

أخاف ينتهي بيا الطريق.. لمفيش

أيوة بخاف..

لما أبص من شباك حياتي

اللي مش شفاف

و ألاقي خطوط العمر

-تقال أو خفاف-

تكسر الضيّ في إزازي

و يخش ضي الأمل مكسور..

مكسور لقلبي و لراسي

أخاف لو أيام الفرج

تنتهي بلحظة تعاسة

أخاف لما أشوف..

الحزن في عيون البشر

لما الظلم بيرسم ع الوشوش

فقر و هم و غم و ضجر

و السفينة من صخرة لصخرة

و من مينا لمينا

ياخدوا منا أجمل ما لينا

ياخدوا الحب اللي في عنينا

ياخدوا منا بعض قوة

قلّوا كانوا أو كتير

أيوة بغير..

لما بشوفِك في مرايتي المسحورة..

مش معايا

لما يبقى اللي بيجمعنا..

مش كفاية

لما آجي أحكي عنّا..

مالقاش حكاية

أيوة بخاف

حتى لو باين سعيد

أيوة بخاف

و عارف..

إن الفرج مش بعيد

أيوة خايف م الجديد

أيوة خايف

و اللي معزيني

إني في الخوف مش وحيد

تمت

أحمد ثروت

9/10/2010