في منطقة مش بعيدة عن البيت.. فيه أرض تابعة للشركة المتحدة كان بعض الأهالي وضعوا إيدهم عليها أيام الثورة و حصل خلاف على أحقية كل واحد في امتلاك الأرض... يعني؛ الأرض دي حدوتتها طويلة ممكن نحكيها بعدين
إمبارح تطور الخلاف بشكل ما أعرفش تفاصيله لكن ملخصه إن الشركة حاولت تستعيد الأرض بطريقة ما من الأهالي و تطور الأمر و حصل أثناء الخلاف دا إطلاق نار
مايلزمنيش دلوقت مين ضرب نار.. أصلا طظ في الحدوتة كلها... المهم إن فيه راجل جارنا غلبان كدة اسمه أحمد.. واحد على قد حاله أوي شاب يمكن في بداية التلاتينيات... متجوز و عنده أطفال صغيرين و فاتح محل صغير أوي بيصلح فيه جزم... الراجل دا قدره إنه كان معدي بالعجلة بتاعته وقت المشكلة و أخد رصاصة في صدره و مات
أصل الناس دي لازم تموت بالرصاص علشان نعرف إنهم موجودين
آخر مرة شفت فيها أحمد كان من كام شهر.. حصل إني كنت قاعد عنده في المحل بتاعه شوية و جه شاب صغير ماسك بخور في إيده -الناس اللي بيعدوا على المحلات يبخروها- لقيت أحمد ناداله لأنه يعرفه و خلاه يبخر المحل الصغير أوي بتاعه... و هو شغال سأله أحمد عن أحواله فقال له إن أبوه مسجون بقاله كام شهر -على ما أتذكر بسبب ديون كانت عليه-.. يعني؛هما كانوا بيتكلموا عادي كأن دي مش أسوأ حاجة حصلتلهم في حياتهم
بعد ما الشاب خلص أحمد طيب بخاطره جامد.. الغريبة إنه إداله فلوس رغم إن أحمد -زي ما هو وضح ليا في الشوية الصغيرين إللي قعدتهم معاه- دخله بسيط جدا من تصليح الأحذية.. و يمكن كل فين و فين لما يجي زبون.. دا اللي حسيته
أنا بقيت لما بشوف الناس دي بحس إني بني آدم جزمة
