"عمو, انت بتزرع البطاطا دي ولا بتصطادها؟!!"
في يوم كنت في الكلية و كان عندي ساعة فاضية بين السكاشن و المحاضرات
فقلت أطلع أمشي شوية على الكورنيش –أصل أنا كليتي على البحر :) -. طلعت من عند
حديقة الخالدين و عديت الطريق بقيت على البحر, قلت أمشي ناحية الأنفوشي و أشوف
هوصل لفين.
الكورنيش يومها ماكانش عليه ناس كتير, و المية كانت شفافة و الموج
عمال يخبط في الصخر, فضلت ماشي و عديت محطة الرمل لحد قرب المنشية كدة لقيت زحمة و
خلق كتير فكان لازم أروح أشوف فيه إيه!!!
وصلت للزحمة؛ لقيتهم بيتفرجوا على ناس شكلهم صيادين –لحد كدة عادي مش
لاقي سبب للزحمة- كان فيه اتنين في الميّة و الباقي واقفين على الشط بيشدوا في
شبكة تقيلة, معقول الشبكة التقيلة دي فيها سمك؟! و لو سمك طب الناس الكتير اللي واقفين
دول بيتفرجوا على إيه؟! من هنا جاتلي قناعة إن اللي في الشبكة مش سمك, ممكن تكون
حاجة وقعت في المية, أو هتلاقيه حيوان مات و صاحبه رماه في البحر زي ما ساعات
بنسمع. لحد اللحظة دي ماكنتش أعرف...
فضلت واقف بتفرج و مستني الشبكة تطلع علشان أشوفها... شوية و لقيت
واحد واقف جنبي عمال يقول "بسم الله الرحمن الرحيم, يا رب". زي ما يكون
قلقان.. قلت لنفسي مابدهاش الموضوع شكله كبير بجد؛ فميلت عليه و سألته "هما
بيسحبوا إيه؟!"
و كانت الإجابة المنطقية الصادمة:
-
بيسحبوا
سمك... هيكونوا بيسحبوا إيه يعني!!
-
و كل
الزحمة دي علشان سمك بيطلع من المية؟!
-
فيهم
اللي جاي يشتري, و فيهم اللي جاي يتفرج.
سكت و انا عمال أقول لنفسي "يا سلام على الروقان". الراجل
كتر خيره حب يتعبني أكتر فقال لي: "دا كمان ممكن يطلعوا بطاطا و
شراغيت."
... إيه الحاجات دي؟! طب الشراغيت و عارفين إنها حاجة غريبة, بس
البطاطا دي أنا عارف إنها بتتزرع, لقيت الموضوع شدني بجد...
الراجل كمل كلامه:
"شايف الصيادين كتير ازاي".. و انا عمال بقول زيه:
"بسم الله ما شاء الله, يا رب يا مسهل"... و هو كمان فضل يقول, شوية و
السمك طلع و حطوه في المركب, بس ماستانتش لحد ماشوف "البطاطا و
الشراغيت", بصراحة ماكنتش عاوز أتبعت تاني, و كمان المحاضرة قربت تبدأ و لازم
أرجع. مشيت شوية صغيرين لحد النصب التذكاري علشان أتفرج على عساكر التشريفة اللي
هناك (و دول لهم قصة تانية), و بعدين لفيت علشان أرجع الكلية.
طول مانا ماشي مش بفكر غير في "البطاطا و الشراغيت", عمال
أقلب الموضوع في دماغي و أضحك. عديت الطريق و دخلت من عند حديقة الخالدين؛ وهناك
لقيت واحد واقف على عربية بطاطا, فضلت أضحك و أنا بتخيل نفسي رايح أسأله:
"عمو, هو انتوا بتزرعوا البطاطا دي ولا بتصطادوها؟!!"
أحمد ثروت السعيد
13/10/2008